| Tákn vonar frumsýnd á næstunni:
Margt líkt með stöðu heyrnarlausra í Namibíu og Íslandi |
 Á næstunni verður frumsýnd í Sjónvarpinu ný íslensk heimildamynd, Tákn vonar, sem fjallar um stöðu og samfélag heyrnarlausra í Namibíu en sem kunnugt er hefur ÞSSÍ verið með metnaðarfullt verkefni í landinu á síðustu árum um nýja sýn í menntamálum heyrnarlausra. Aðalefni myndarinnar er saga ungrar heyrnarlausrar konu, Treshiu, sem vinnur sem sjálfboðaliði og kennir í litlum leikskóla í norðurhluta Namibíu.
"Treshia er einstaklega heillandi persóna, býr yfir reisn þrátt fyrir margvíslegt mótlæti í lífnu og sagan hennar gefur tilefni til að skoða ýmsa þætti nánar og skýrir m.a. hvað fáfræði getur haft skelfilegar afleiðingar og hvað tækifæri til menntunar skipta miklu máli," segir Margrét Blöndal dagskrárgerðarmaður með meiru sem er höfundur myndarinnar ásamt Vilhjálmi Þór Guðmundssyni, kvikmyndagerðarmanni.
Verkefnið í Namibíu er unnið með Samskiptamiðstöð heyrnarlausra og heyrnarskertra og þar hefur Júlía Hreinsdóttir verið í aðalhlutverki við uppbyggingu á táknmálsnámi. Hún skrifar athyglisverða grein í Döffblaðið sem kom nýlega út og segir margt líkt með stöðu heyrnarlausra á Íslandi og Namibíu. Að mestum hluta fjallar þó grein Júlíu um afríska fréttaþjónustu á táknmáli í Namibíu og hún segir m.a.:
"Við Íslendingar lítum gjarnan svo á að við séum fremst og mest á öllum sviðum og að við búum í fullkomnu tækni- og upplýsingasamfélagi en það er ráðlegast að skoða málin af hæfilegri auðmýkt. Hér í Namibíu er mikil fátækt og gömul tækni en þeir eru góðir! Á þessu sviði standa Namibíumenn okkur miklu framar. Við heyrnarlaust fólk erum eðlilegur hluti af þeim sem ríkissjónvarpið NBC þjónar."
Því er við að bæta að heimildamyndin Tákn vonar/Sign of Hope, sem er framleidd af ÞSSÍ í samvinnu við RUV, verður væntanlega sýnd í namibíska sjónvarpinu á næsta ári.
Döffblaðið - sjá viðtalið við Júlíu á bls. 8-9
|
| Afríkusambandið boðar til leiðtogafundar vegna fjármálakreppunnar |
 Afríkusambandið hefur boðað til leiðtogafundar í næsta mánuði þar sem kallað verður eftir viðbrögðum álfunnar við þeirri fjármálakreppu sem nú ríður yfir heiminn. Afríkusambandið hefur einnig hvatt aðilarríkin til að herða beltisólar í því skyni að draga úr áhrifum hruns á heimsmörkuðum.
Frétt Reuters |
| Þróunaraðstoð undir mæliker |
Hver er árangurinn af þróunaraðstoð? Hvað virkar? Og hvað getum við lært af því? Danska utanríkisráðuneytið hefur nýuverið gefið út úttektarskýrslur um þróunarsamvinnu Dana í þremur löndum Afríku: Mósambík, Gana og Benín. Skýrslurnar ná til tæplega tuttugu ára samvinnu og voru unnar af sjálfstæðum ráðgjafafyrirtækjum.
Úttektirnar taka til geira í löndunum þremur sem unnt er að bera saman og Danir hafa verið í þróunarsamvinnu. Alls hafa Danir lagt til 10,2 milljarða danskra króna til þessara þriggja landa á tímabilinu sem úttektirnar ná til.
Frétt danska utanríkisráðuneytisins
|
|
Auðsældarkreppa en ekki örbirgðar, segir biskup |
|
Karl Sigurbjörnsson, biskup Íslands, setti kirkjuþing í Grensáskirkju um síðustu helgi. Hann minnti kirkjuheim á að gleyma ekki hlutskipti milljóna manna sem að búa við örbyrgð úti um allan heim. Í frétt Ríkisútvarpsins sagði:
Herra Karl Sigurbjörnsson, biskup Íslands: "Þeir alvarlegu erfiðleikar sem íslensk þjóð gengur nú í gegnum er umfram allt auðsældarkreppa. Ekki örbirgðar. Íslendingar hafa aldrei verið auðugri og þjóðin aldrei búið við betri innviði og forsendur en nú til að takast á við og vinna sig út úr áföllum. Sannarlega erum við vellauðug í samanburði við þau sem að vart hafa til hnífs og skeiðar og sem er hlutskipti milljóna barna um allan heim. Okkar er að gleyma þeim ekki og rétta fram hjálparhönd líka og ekki síður þegar við finnum að okkur þrengt í lífskjörum. Það væri til marks um auðugt hjarta. Að leggja okkur fram um einmitt nú að styðja þau börn sem að þurfa áfram á aðstoð okkar að halda."
Við setningu kirkjuþings var hálfrar aldar afmæli þingsins minnst og þess að 75 ár eru liðin frá því að kirkjuráð tók til starfa. Vegna þrenginga í efnahagsmálum var ákveðið að stilla hátíðarhöldunum í hóf en gefa þess í stað eina og hálfa milljón króna til hjálparstarfs kirkjunnar. Forseti Íslands, Ólafur Ragnar Grímsson, ávarpaði kirkjuþing við setninguna og nefndi að verðmætamat margra hefði brenglast á undanförnum árum.
Herra Ólafur Ragnar Grímsson, forseti Íslands: "Að undanförnu höfum við lifað tíma óhófs og allsnægta. Auður og efni aldrei meiri, hárreistar hallir hýstu markaðstorg viðskipta og fjármagns. Og eyrir ... var agnarsmár á þeim vogarskálum sem mældu arð og umbun. Verðmætin voru um skeið metin á annan hátt en áður. Þjóð sem að var rótföst í lífsháttum sveitar og sjósóknar gekk hiklaust um gáttir á alþjóðavelli. Í þeim efnum geta þeir borið höfuðið hátt sem að vöruðu við dansinum í kringum gullkálfinn minntu á verðmætin sem að verða ekki keypt með jarðneskum auði, hvöttu til trúmennsku, trygglyndis og samábyrgðar."
Frétt RUV |
| Tansanía fær 750 milljón dali í fjárlagastuðning |
Tansanía fær 750 milljónir dala í almennan fjárlagastuðning frá þjóðum sem veita þróunaraðstoð fyrir fjárlagaárið 2008/09. Í vikunni greiddi Alþjóðabankinn 160 milljónir dala í fjáralagaðastoð til landsins, að því er segir í frétt Bistandsaktuelt í Noregi.
Danir leiða hópinn sem veitir beinan fjárlagastuðning en miklar efasemdir hafa verið uppi um slíkan stuðning eftir spillingarmál sem m.a. tengdust Seðlabanka Tansaníu.
Útlendir veitendur þróunaraðstoðar hafa beðið eftir skýrum svörum frá ríkisstjórn Tansaníu um lyktir spillingarmálanna og samningaviðræður hafa staðið yfir í níu mánuði. Að mati fulltrúa Dana hefur ríkisstjórn Tansaníu tekið með ábyrgum hætti á spillingarmálunum og forseti landsins gefið þeim sem hlut eiga að máli tvo kosti: að greiða fjármagnið til baka eða sæta ákæru. Frétt Bistandaktuelt | |
|
|
|
| Frjáls félagasamtök draga saman seglin |
 |
Frjáls félagasamtök og mannúðarsamtök eru mörg hver að draga saman seglin með uppsögnum starfsmanna og endurskoðun á verkefnum ársins 2009 vegna tekjusamdráttar sem rekja má til fjármálakreppunnar. Samkvæmt frétt IRIN fréttaveitunnar hafa fjáröflunarsérfræðingar þriggja stærstu samtakanna -Oxfam í Bretlandi, Barnaheilla í Bretlandi og World Vision í Bandaríkjunum - staðhæft að aukin umsvif í verkefnum, samkvæmt áætlunum fyrir næsta ár, yrðu ekki að veruleika sökum þrenginganna. Áætlanir gerðu ráð fyrir nokkurri aukningu í umsvifum, t.d gerði Oxfam ráð fyrir 5% aukningu á árinu 2009. Nú sé hins vegar búið að setja prósentuna á núll. IRIN frétt |
| Jó svarar Solheim |
|
|
Á dögunum sögðum við frá því hér í Veftímaritinu að Erik Solheim norski þróunarmálaráðherrann hefði óskað eftir því við háskólanema að þeir komi fram með hugmyndir um það hvernig bæta megi norska þróunarsamvinnu á sviði menntamála. Einn af þeim sem tók ráðherrann á orðinu var Norðmaðurinn Jó Tore Berg, sérfræðingur á aðalskrifstofu ÞSSÍ, en svar hans má lesa á vef Norad, þróunarsamvinnustofnunar Noregs.
|
| Margt smátt komið út |
 |
Margt smátt - fréttablað Hjálparstarfs kirkjunnar er komið út. Í því má finna margar áhugaverðar greinar og fréttir af starfinu. Má nefna grein um réttindamiðaða þróunaraðstoð, um góða afkomu Hjálparstarfsins á síðasta starfsári, frásaga sjálfboðaliða sem dvelja í Malaví, viðtal við ferðalang sem fór til Úganda í sumar og fleira. Margt smátt |
| Ósiðlegt að standa ekki við skuldbindingar um þróunaraðstoð |
Ríki Evrópusambandsins verða að standa við skuldbindingar sínar um þróunaraðstoð við Afríku, án tillits til alþjóða fjármálakreppunnar, að mati Hans-Gert Pottering forsta Evrópuþingsins. "Það væri algerlega ósiðlegt ef við stæðum ekki við gefin loforð. Það er skylda okkur að forða því að álfan verði aðskilin frá öðrum heimshlutum," sagði Pottering á fundi með fréttamönnum í Jóhannesarborg í gær.
Frétt DW-World |
| Þriggja daga herferð gegn mislingum |
 |
|
Þriggja daga bólusetningarherferð gegn mislingum hófst í gær í Malaví en dauðsföllum af völdum mislinga hefur fjölgað í landinu. Ætlunin er að bólusetja tvær milljónir barna á þessum þremur dögum, á aldrinum frá níu mánaða til fimm ára, að því er fram kemur í dagblaðinu Nyasa Times í Malaví.
|
| Besta stuttmyndin frá Mósambík |
|
|
Stuttmynd frá Mósambík bar sigur úr býtum á Africa in Motion (AIM) stuttmyndahátíðinni en þar voru sýndar átta stuttmyndir eftir unga og efnilega kvikmyndaframleiðendur frá Afríku. Sigurmyndin heitir "I Love You" og leikstjórinn er Rogério Manjate frá Mósambík. Myndin er eins og heiti hennar gefur til kynna ástarmynd og þykir býsna opinská á afrískan mælikvarða, að því er fram kemur í fréttum. |
| Fegurðardrottning Malaví vill á þing - Palin er fyrirmyndin |
 |
|
Núverandi ungfrú Malaví, Peth Msiska, hefur tilkynnt að hún vilji á þing og sækist eftir þingsæti í kosningum sem haldnar verða í maí á næsta ári. Msiska, sem er 24 ára, segir að nú sé rétti tíminn til að ganga í raðir DPP (Democratic People´s Party) og hún hafi ákveðið að sinna stjórnmálum til þess að leggja sitt af mörkum í viðtleitni til að breyta lífi fólks, einkum til sveita. Þar eru vatns-og hreinlætismálin efsta á blaði, einnig raforkumál, málefni munaðarlausra og menntamál.
Fram kemur í frétt IPS fréttaveitunnar að Sarah Palin, fyrrverandi fegurðardrottning (var í 3ja sæti í keppni í Alaska) og núverandi varaforsetaefni rebúblikana í Bandaríkjunum, hafi verið malavísku fegurðardrottningunni hvatning til að stíga fram á pall stjórnmálanna.
| |
|
