| Fjármálakreppa dregur úr þróunaraðstoð, segir sagan |
Í sögulegu ljósi er hægt að ganga að því vísu að fjármálakreppa dragi úr þróunaraðstoð, segir David Roodman hjá Center for Global Development. Hann bendir á að staðbundnar fjármálakreppur á síðustu áratugum hjá þjóðum sem veita þróunaraðstoð hafi í öllum tilvikum leitt til þess að stuðningur þeirra þjóða við fátæk lönd hafi minnkað. Dæmin: Japan árið 1990, Finnland, Noregur og Svíþjóð árið 1991. Norrænu ríkin drógu mismikið úr þróunarsamvinnu, Noregur 10%, Svíþjóð 17% og Finnar 62%.
David Roodman bendir á að það hafi tekið Norðmenn og Svía 6-8 ár að koma þróunarsamvinnu aftur í svipað horf en hvorki Finnar né Japanir hafi enn náð fyrri styrk í þróunarsamvinnu. Hann telur raunhæft að reikna með að næstu fimm árin verði framlög til þróunarmála skert.
Greinin |
| Úrbætur í vatns- og hreinlætismálum ættu að vera forgangsmál |
 Veitendur þróunaraðstoðar ættu að einbeita sér að úrbótum í vatns- og hreinlætismálum í þróunarríkjum áður en þeir reyna að bæta menntun, heilsu og viðskipti, segir í nýrri skýrslu frá Háskóla Sameinuðu þjóðanna. Að koma upp salernum og tryggja aðgang að hreinu vatni myndi vera áhrifameira en nokkuð annað í baráttunni gegn fátækt, segja skýrsluhöfundar. Án þessarar grunnþjónustu er líklegt að önnur verkefni til að bæta velferð fólks mistakist, segir Zafar Adeel framkvæmdastjóri þeirrar deildar háskóla SÞ sem fer með vatns-, hreinlætis- og heilbrigðismál.
"Þróunarfé yrði miklu betur varið ef fyrst yrði tekið á vatns- og hreinlætismálum," segir hann.
Fimm þúsund börn deyja á hverjum degi í þróunarlöndum af læknanlegum sjúkdómum sem rekja má til neyslu á menguðu vatni.
Því er við að bæta að Þróunarsamvinnustofnun Íslands vinnur að stóru verkefni verkefni á sviði vatns- og hreinlætismála í Malaví og einnig er unnið að gerð vatnsbóla meðal Himba í Namibíu.
Frétt Financial Times |
| Viðbúnaður í Mósambík vegna óveðra |
 Á hverju ári dynja náttúruhamfarir yfir Mósambík, flóð og fellibylir, en á síðustu árum hafa stjórnvöld kappkostað að vera betur undirbúin þegar hamfarirnar skella á. Viðbúnaður innanlands hefur tekið stórstígum framförum og ljóst að viðvaranir og upplýsingagjöf til íbúa á hamfarasvæðum hefur bjargað mörgum mannslífum. IRIN fréttaveitan segir frá viðbúnaði í litlu þorpi, Chilembbende.
Í annarri frétt sömu fréttaveitu segir frá áhrifum náttúruhamfara á fátækt land eins og Mósambík þar sem flóð, felllibylir og þurrkar senda fátæk samfélög út á ystu nöf bjargarleysis. Vitnað er til þess að á síðustu þremur áratugum hafi 35 ofsafengin vatnsveður skollið á landinu og haft áhrif á sextán milljónir manna. Samkvæmt upplýsingum frá Veðurstofu Mósambík, INAM, hefur slíkum óveðrum fjölgað á undanförnum árum sökum loftslagsbreytinga.
|
| Bush hvetur þjóðir heims til að standa vörð um þróunaraðstoð |
 George Bush forseti Bandaríkjanna hvetur þjóðir heims á tímum efnahagskreppu í heiminum að standa við skuldbindingar sínar um alþjóðlega þróunaraðstoð. Alþjóðlegur fundur um þróunarsamvinnu var haldinn í gær í Washington með þátttöku 500 fulltrúa samtaka og stofnana á sviði þróunarmála, m.a. tóku þátt í fundinum Condoleezza Rice utanríkisráðherra Bandaríkjanna, Ellen Johnson Sirleaf forseti Líberíu og tónlistarmaðurinn Bob Geldof.
Frétt AP | |
|
|
|
| Tíu ára afmæli Sjávarútvegsskólans |
 |
Um þessar mundir fagnar Sjávarútvegsskólinn 10 ára starfsafmæli. Af því tilefni er efnt til ráðstefnu um sjálfbærni í sjávarútvegi, eða "Sustainble Fisheries" í sem víðustum skilningi. Á ráðstefnunni verða rædd þau atriði sem skipta munu máli í framtíðarþróun, sér í lagi í þróunarlöndum, s.s. veiðar, vinnsla og viðskipti með fisk og fiskafurðir. Innlegg ráðstefnunnar mun einnig styrkja undirstöður þeirrar fræðslu og þjálfunar sem Sjávarútvegsskólinn veitir. Ráðstefnan verður haldin 24.-25. október á Hótel Loftleiðum. Fyrri daginn flytja kunnir vísindamenn lykilerindi um framtíð sjávarútvegs og fiskiðnaðar í heiminum, en seinni daginn verða framtíðarhorfur í eftirfarandi þremur málaflokkum krufnar: 1. Mat á fiskistofnum og fiskveiðistjórnun 2. Gæðastjórnun í fiskiðnaði og viðskipti með fisk 3. Fiskveiðar og fiskeldi Heimasíða ráðstefnunnar |
| Banda hvetur til sátta milli Madonnu og Guy |
 |
|
Líffræðilegur faðir piltbarnsins sem söngkonan Madonna ættleiddi frá Malaví á síðasta ári segist ekki hafa fengið neinar upplýsingar um skilnað hennar og eiginmannsins og hann vilji ekki að sonurinn alist upp hjá einstæðri móður. Samkvæmt frétt Time í Lundúnum sér Banda eldri eftir því að hafa samþykkt ættleiðinguna og hvetur Madonnu og Guy að leysa ágreining sinn í þágu þriggja ára drengsins.
|
| Dagur Sameinuðu þjóðanna á föstudag |
 |
|
Loftslagsbreytingar eru eitt mikilvægasta málið sem Sameinuðu þjóðir fást við og dagur Sameinuðu þjóðanna í ár er helgaður þeirri ógn sem felst í loftslagsbreytingum. Ban Ki-moon, framkvæmdastjóri Sameinuðu þjóðanna segir að tjón af völdum loftslagsbreytinga hafi svipuð áhrif á mannlíf eins og stríðsátök. Yfirskrift málþings á degi Sameinuðu þjóðanna er "Loftslagsbreytingar: Hvað við getum gert".
|
| Yfirvofandi fæðuskortur í sunnanverðri Afríku? |
|
|
Fæðuöryggi er ógnað í Suður-Afríku og nágrannalöndum að mati Franie Brink landbúnaðarráðgjafa. Í frétt Namibian segir hann að framleiði Suður-Afríka ekki nóg af maís á komandi mánuðum gæti það leitt til mannlegra hörmunga í Svasílandi, Lesóto, Namibíu, Botsvana og Simbabve.
Haft er eftir Brink að fæðubirgðir heimsins séu þær minnstu í mörg ár og dugi aðeins í fimmtíu daga.
| |
|
