| Dregur fjármálakreppan úr stuðningi við þjóðir Afríku? |
 Óttast er að niðursveiflan í alþjóða hagkerfinu leiði til þess að ríkar þjóðir auki ekki framlög til þróunarmála. Leiðtogar heims hittast í New York á Allsherjarþingi Sameinuðu þjóðanna í vikunni og ræða m.a. Þúsaldarmarkmið Sþ á sérstöku aukaþingi. Mikið skortir á að þjóðir heims verji fjármunum til þróunarmála í samræmi við markmið Sameinuðu þjóðanna um 0,7% af vergum þjóðartekjum. Samkvæmt tölum frá OECED er hlutfall framlaga ríku þjóðanna ekki nema um 0,28%.
Ban Ki-moon framkvæmdastjóri Sameinuðu þjóðanna hvatti ríkar þjóðir í gær til þess að standa við skuldbindingar frá Gleneagles fundinum árið 2005 og tvöfalda framlög til þróunarmála í Afríku. Á þeim fundi samþykktu G8 ríkin að auka framlög til Afríku á ári hverju fram til ársins 2010 um 25 milljarða dala. Aðeins fjórðungur þess fjár hefur skilað sér.
Bæði forsætis- og utanríkisráðherra Íslands sækja þingið í New York.
|
| Gífurlegt kynjabil milli orða og veruleika |
Eitt aðalmálið á dagskrá 150 leiðtoga heims á fundinum í New York um stöðu Þúsaldarmarkmiðanna er þriðja markmiðið um jafnrétti kynjanna og styrkingu á frumkvæðisrétti kvenna. Mikill munur er á milli loforða og efnda í þessum málaflokki og samkvæmt frétt IPS fréttaveitunnar eru konur aðeins um fjórðungur þingmanna í heiminum.
Á dögunum var reyndar sagt frá því að í Afríkuríkinu Rúanda væru konur í meirihluta á þingi en kosið var í síðustu viku og bráðabirgðatölur gáfu til kynna að 44 konur hefðu verið kosnar en þingmenn eru 80 talsins. Rúanda mun vera eina landið í heiminum þar sem konur eru í meirihluta. Á Kosta Ríku eru konur á þingi 43.9%.
Þróunarfé sérstaklegt eyrnamerkt jafnrétti hefur aukist á undanförnum árum, þrefaldast frá árinu 2002 til 2006, úr 2.5 milljörðum dala í 7.2 milljarða. Nýja Sjáland og Kanada verja hlutfallslega mestu fé til jafnréttismála, um 11% hvor þjóð.
Þessar upplýsingar og margar aðrar markverðar koma fram í nýrri skýrslu UNIFEM, Who Answers to Woman.
Fréttaskýring IPS |
| Malaríutilvikum fækkar |
 Að minnsta kosti sjö Afríkuríki hafa náð þeim árangri að fækka dauðsföllum af völdum malaríu um helming á síðustu tveimur árum, að því er fram kemur í nýrri skýrslu Alþjóðaheilbrigðismálastofnunarinnar (WHO), World Malaria Report. Þau ríki sem náð hafa mestum árangri eru Eritrea, Rúanda og eyríkið São Tomé and Príncipe, en mikið hefur einnig áunnist í Madagaskar, Sambíu og Tansaníu.
Alls greindust 247 milljón sjúkdómstilvik af malaríu árið 2006 sem er umtalsverð fækkun frá árinu á undan þegar WHO taldi malaríutilvikin vera á bilinu 350 til 500 þúsund. Ennfremur hefur dauðsföllum fækkað frá því að vera um ein milljón talsins árið 2005 niður í 880 þúsund árið 2006.
Samkvæmt skýrslu WHO er þennan árangur einkum að þakka aukinni notkun malaríuneta en einnig hefur meðferð við sjúkdómnum aukist og sums staðar hefur tekist að fækka moskítóflugunni sem ber veiruna. Þá hefur WHO breytt aðferðum til talningu á moskítótilvikum og samkvæmt gein í The Economist er hluti af fækkun tilvika tilkominn vegna breytta aðferða við talningu.
Þrátt fyrir sýnilegan árangur í baráttunni við malaríu er sjúkdómurinn gífurlega útbreiddur. Flestir sem látast af völdum sjúkdómsins eru börn undir fimm ára aldri. Malaría er útbreiddust í Afríku þar sem helmingur allra sjúkdómstilvika á árinu 2006 greindist í fimm löndum álfunnar, Nígeríu, Kongó, Eþíópíu, Tansaníu og Kenía. Alls greindust 247 milljón tilvik af malaríu árið 2006.
Af 109 löndum þar sem Malaría greindist voru 45 í Afríku.Fréttatilkynning WHO
|
| Norðmenn aðvara stjórnvöld í Úganda |
Erik Solheim, þróunarmála- og umhverfisráðherra Noregs, segir Norðmenn íhuga að hætta stuðningi við stjórnvöld í Úganda í olíumálum ef þau taki ekki til greina umhverfissjónarmið í rannsóknum sínum á hugsanlegum olíulindum í Albertine héraði. Ennfremur vilja Norðmenn að ríkisstjórn Úganda tryggi gegnsæi í öllum málum tengdum rannsóknum og borunum. Fram kemur í frétt The Monitor í Úganda að farið sé með öll mál tengd olíuleitinni sem ríkisleyndarmál. |
| Tvöfalt fleiri við hungurmörk |
Bresku hjálparsamtökin Care segja í nýrri skýrslu að 220 milljónir manna séu við hungurmörk eða tvöfalt fleiri en árið 2006. Samtökin krefjast þess að lagfæringar verði gerðar á skipulagninu neyðar- og þróunaraðstoðar því hjálpin berist seint og sé skammsýn.
Skýrsla samtakanna kallast "Living on the Edge of Emergency". Þar segir að miklir fjármunir til neyðaraðstoðar sem hefði verið hægt að afstýra kunni að fara í súginn nema því aðeins að gripið verði til viðeigandi ráðstafana sem tíundaðar eru í þremur liðum. Þær fjalla um að veitendur þróunaraðstoðar uppfylli skulbindingar sínar um framlög; að áhersla sé lögð á fyrirbyggjandi aðgerðir og að gjáin milli neyðar- og þróunaraðstoðar verði brúuð með það fyrir augum að auka skilvirkni og árangur.
Skýrslan í heild (pdf) | |
|
|
|
| Malaví: Helmingur íbúa yngri en 18 ára |
 |
|
Í Malaví er rúmlega helmingur íbúa börn yngri en 18 ára. Um fjórar milljónir þessara barna lifa í fátækt sem grefur undan vexti og þroska þeirra. Undanfarin ár hafa horfur á lífsafkomu barna batnað og dregið hefur úr dánartíðni. Frá 1990 til 2006 féll dánartíðni barna undir 5 ára aldri úr 221 í 120 af hverjum 1000 fæddum börnum og er nú sú sama eða lægri en í 30 öðrum löndum Afríku sunnan Sahara. Þessa lækkun má fyrst og fremst rekja til aukinna bólusetninga og A-vítamíngjafa en barn sem skortir A-vítamín er í 25% meiri hættu á að deyja af völdum sjúkdóma eins og mislinga, malaríu og niðurgangs. Einnig er hlutfall mæðra sem gefa börnum sínum eingöngu brjóstamjólk fyrstu sex mánuðina í lífi barnsins fremur hátt í Malaví (56%) miðað við önnur lönd í Afríku sunnan Sahara.
Þetta kemur m.a. fram í nýrri ársskýrslu UNICEF um Malaví sem Ásdís Bjarnadóttir starfsnemi á umdæmisskrifstofu ICEIDA í Lilongve hefur tekið saman.
|
| Nánast óbreytt framlag til Mósambík |
Mósambík fær á næsta ári 72 milljónum dala meira fjármagn frá veitendum þróunaraðstoðar miðað við yfirstandandi ári - en að stærstum hluta er hækkunin tilkomin vegna gengisbreytinga.
Tilkynnt var um þessa niðurstöðu á blaðamannafundi eftir mánaðarlangar viðræður stjórnvalda við 19 samstarfsþjóðir - Programme Aid Partners (PAP) - en það eru þjóðir sem veita fjárlagastuðning, amk að einhverju leyti.
Samkvæmt frétt AllAfrica er Alþjóðabankinn eini veitandinn sem hækkar framlag sitt milli ára, aðrar tölur hækka aðeins vegna þess fallandi gengis bandaríska dollarans.
Fram kemur í fréttinni að Bandaríkin og Japan veiti ekki fjáralagastuðning.
|
| Brasilía stærsta samstarfsland Noregs |
|
|
Norðmenn hafa heitið Brasilíumönnum allt að einum milljarði Bandaríkjadala í þróunaraðstoð á næstu átta ára, eða fram til ársins 2015. Framlagið gerir Brasilíu að stærsta samstarfslandi Noregs í þróunarsamvinnu.
Jens Stoltenberg forsætisráðherra Noregs og Luiz Inácio Lula da Silva forseta Brasilíu skrifuðu undir samkomulagið á dögunum en norski forsætisráðherrann hefur verið á ferð um þennan heimshluta.
Norska framlagið verður notað í baráttunni gegn eyðingu regnskóganna gegnum svonefndan Amazon sjóð.
|
| Ný skýrsla um konur sem deyja af barnsförum |
Í nýrri skýrslu sem kynnt var sl. föstudag af Barnahjálp Sameinuðu þjóðanna, UNICEF, er athyglinni beint að þeirri hættu sem konur í þróunarlöndunum búa við á meðan á meðgöngu stendur og í fæðingu.
Sjá nánar frétt UNICEF á Íslandi |
|
Veftímarit um þróunarmál er gefið út af Þróunarsamvinnustofnun Íslands. Ritinu er ætlað að glæða umræðu um þróunarmál og gefa áhugasömum kost á að fylgjast með þvi sem hæst ber hverju sinni. Efni veftímaritsins þarf ekki endilega að endurspegla stefnu stofnunarinnar.
Þeir sem vilja afskrá sig af netfangalista eru vinsamlegast beðnir um að senda beiðni til okkar á netfangið iceida@iceida.is.
Skráið ykkur í áskrift á heimasíðunni, www.iceida.is og látið endilega aðra sem þið vitið að hafa áhuga á þróunarmálum vita af tilvist veftímaritsins.
Bestu kveðjur
Útgáfu- og kynningardeild ÞSSÍ
|
| |
|
