Leiðtogafundur um Þúsaldarmarkmiðin
- opinber framlög til þróunarmála minnka tvö ár í röð |
 Í tengslum við Allsherjarþing Sameinuðu þjóðanna í New York í næstu viku verður efnt til fundar leiðtoga heims um stöðu Þúsaldarmarkmiðanna. Geir Haarde, forsætisráðherra, og Ingibjörg Sólrún Gísladóttir utanríkisráðherra, sækja fundinn fyrir Íslands hönd.
Fjárframlög þjóða sem veita þróunaraðstoð er stórum minna en þær hafa heitið og samkvæmt nýrri skýrslu vantar 31,4 milljarða dala til að staðið sé við gefin fyrirheit. Meira fé eru forsenda þess að auka líkurnar á því að Þúsaldarmarkmiðunum verði náð. Þetta kemur fram í nýrri skýrslu sem gefin er út í vegna leiðtogafundarins í New York.
Delivering on the Global Partnership for Achieving the Millennium Development Goals er heiti skýrslunnar sem unnin var af MDG Gap Task Force nefndinni sem framkvæmdastjóri SÞ setti á laggirnar í fyrra.
Fram kemur í skýrslunni að alþjóðleg þróunaraðstoð (ODA) hafi minnkað tvö undanfarin ár, um 4,7% árið 2006 og 8.4% árið 2007.
Aðeins fimm þjóðir uppfylla samþykkt Sameinuðu þjóðanna um að verja 0,7% af vergum þjóðartekjum til alþjóðlegrar þróunarsamvinnu en það eru Norðmenn, Svíar, Danir, Lúxemburgarar og Hollendingar. Framlag ríku þjóðanna til þróunarmála er að meðaltali 0,28% eða svipað og núverandi framlag Íslands til málaflokksins.
|
| Líklegt að fyrsta Þúsaldar-markmiðinu verði náð! |
 Í nýrri skýrslu um stöðu Þúsaldarmarkmiðanna segir að tölur um fátækt í heiminum staðfesti að líklegt sé að fyrsta markmiði þeirra verði náð, þ.e. að fækka fátækum um helming fyrir árið 2015 miðað við árið 1990.
Ban Ki-moon, framkvæmdastjóri Sameinuðu þjóðanna, varar þó við því í skýrslunni að ávinningur undanfarinna ára í baráttunni við fátækt geti minnkað verulega vegna verðhækkana á matvælum og orku og niðursveiflunnar í alþjóða hagkerfinu.
Skýrslan fjallar um stöðu Þúsaldarmarkmiðanna og heitir: UN Millennium Development Goals Report 2008 og kemur út í aðdraganda alþjóðlega leiðtogafundarins um Þúsaldarmarkmiðin sem haldinn verður í New York í næstu viku.
Samkvæmt gögnum Alþjóðabankans hefur fátækum fækkað í heiminum um 400 milljónir á árunum frá 1990 til 2005, úr 1800 milljónum í 1400 milljónir. Mest hefur fækkunin orðið í Asíu, einkum í Kína. Hins vegar hefur fátækum fjölgað í löndunum sunnan Sahara í Afríku.
Efnahagslægðin ásamt verðhækkunum á mat og orku ógnar hins vegar þessum árangri og óttast er að 100 milljónir manna fari undir fátæktarmörk af þeim sökum, segir í skýrslunni.
Fréttir um skýrsluna frá fréttaveitunum IRIN, IPS og VOA |
| Namibía: Heilsufarsmarkmiðin mikil áskorun |
Nýútgefin Þróunaráætlun Namibíu (NDP III) sýnir að þjóðin á enn langt í land með að ná þeim atriðum Þúsaldarmarkmiðanna sem lúta að heilsufari. Um er að ræða markmið númer 4, 5, 6 og 7 sem fjalla um HIV/Aids, malaríu og aðra sjúkdóma, að draga úr barna- og mæðradauða og tryggja sjálfbæra þróun.
Í frétt New Era dagblaðsins í Namibíu er samkvæmt nýju Þróunaráætluninni - sem gildir til 2012 - ákveðið að auka lyfjameðferð vegna HIV og alnæmis í 34 sjúkrahúsum um gervallt landið þannig að meðferðin nái til 54 þúsunda einstaklinga en nú njóta 34 þúsund smitaðir slíkrar meðferðar. Þá er ætlunin að lækka um fjórðung tíðni alnæmis í aldurshópnum 15-25 ára, lækka tíðni malaríu um 40% og berkla um 85%.
Ennfremur er ætlunin að gera stórátak í lækkun nýburadauða sem er hár í Namibíu. Af hverjum 1000 fæddum börnum deyja 146 á fyrsta ári en fyrir 2012 á að ná þessari tölu niður í 38 af hverjum eitt þúsund. Ungbarnadauði er einnig hár í Namibíu, 77 börn af hverjum þúsund deyja áður en fimm ára aldri er náð, og þessari tölu á að koma í 45 af hverjum þúsund fyrir árið 2012.
|
| Ásókn í úran lyftistöng fyrir efnahag Namibíu |
Í orkuleit samtímans hefur spurn eftir úrani aukist og Namibía nýtur góðs af þeirri þróun. Namibía er í sjötta sæti yfir þær þjóðir sem framleiða mest af úrani en ársframleiðsan er um 3,800 tonn, eða um 7% heimsframleiðslunnar.
Um fjörutíu erlend fyrirtæki hafa sérstakt leyfi til málmleitar frá námufélögum og orkumálaráðuneytinu. Úran er unnið í tveimur námum og fyrirhugað er að taka tólf aðrar í notkun í náinni framtíð. Þá er unnið að stefnumörkun um kjarnorku með fulltingi IAEA, alþjóða kjarnorkumálastofnunarinnar. Frétt IPS | |
|
|
|
| Ný lög um alþjóðlega þróunarsamvinnu Íslands |
 |
|
Ingibjörg Sólrún Gísladóttir utanríkisráðherra segir að samþykkt nýrra laga á Alþingi um alþjóðlega þróunarsamvinnu Íslands marki tímamót en með samþykktinni er innsiglað markmið stjórnarsáttmála ríkisstjórnarinnar um að þróunarsamvinna sé nýr hornsteinn íslenskrar utanríkisstefnu. Segir ráðherra þróunarsamvinnu lykilmál alþjóðasamfélagsins og forsenda heimsöryggis, friðar og réttlætis. Með nýju lögunum hafi Alþingi stigið sögulegt skref til að uppfylla skyldur Íslands í samfélagi þjóðanna.
Þannig hljóðar upphafi fréttatilkynningar utanríkisráðuneytisins frá því á föstudag en þá efndi ráðherra til fundar með fréttamönnum í tilefni af samþykkt nýju laganna.
Innsend erindi um frumvarpið, m.a. frá Rauða krossinum, Hjálparstarfi kirkjunnar auk minniblaða frá utanríkisráðuneyti og ÞSSÍ
|
| Dauðsföllum barna fækkar |
 |
|
Barnahjálp Sameinuðu þjóðanna, UNICEF, segir að barnadauði hafi minnkað í heiminum um 27% á síðustu tveimur áratugum. Fækkun dauðsfalla barna yngri en fimm ára er einkum skýrður með aukinni brjóstagjöf, almennari notkun A vítamíns, bólusetningum við mislingum, moskítónetum og betri vörnum við HIV/Aids.
Á síðasta ári létust 9,2 milljónir barna yngri en fimm ára.
|
| Hollendingar fjárfesta fyrir 500 milljónir evra í endurnýjanlegri orku í þróunarlöndum |
Þróunarmálaráðherra Hollands, Bert Koenders, kynnti á dögunum á hollenska þinginu stefnuskrá um umhverfismál og endurnýjanlega orku í þróunarlöndunum. Í stefnuskránni er útskýrt hvernig Hollendingar áforma að verja 500 milljónum evra á næstu fjórum árum til endurnýjanlegra orkugjafa í þróunarlöndum, til uppbyggingar orkustöðva á sviði sólar-, vinds- og vatnsorku. Fjárfestingin á að styðja við hagvöxt, lífsgæði og auka líkurnar á því að Þúsaldarmarkmiðunum verði náð.
| |
|
Gerist áskrifendur! 