| Toppfundurinn í Accra:
Verulegar breytingar boðaðar á fyrirkomulagi þróunarsamvinnu |
 Fulltrúar þróunarríkja og ríkja sem veita þróunaraðstoð hafa orðið sammála um að gera verulegar breytingar á því fyrirkomulagi hvernig framlögum til þróunarmála er varið og eytt. Eftir þriggja daga snarpar samningaviðræður á toppfundinum í Accra, höfuðborg Ghana, varð samkomulag um aðgerðaáætlun, Accra Agenda for Action. Þróunarríkin skuldbinda sig til að stýra eigin framtíð, veitendur þróunaraðstoðar skuldbinda sig til að betrumbæta samstarfið sín á milli og fulltrúar beggja heita því að upplýsa hverjir aðra og eigin ríkisborgara.
Í greinargerð með yfirlýsingunni frá Accra segir: "Við skuldbindum okkur til að útrýma fátækt og stuðla að friði og velsæld með því að byggja upp sterkara og árangursríkara samstarf sem leiði til þess að markmið þróunarríkjanna um þróun rætist." Fram kemur að framfarir hafi orðið á þessu sviði, fyrir fimmtán árum hafi tveir af hverjum fimm búið við sárafátækt en í dag sé hlutfallið komið í einn af fjórum. Engu að síður búi 1.4 milljarður manna - einkum konur og stúlkur - við sárafátækt, víða í heiminum skorti hreint vatn og heilsugæslu. Nú bætist við nýjar ógnir: hækkandi matvælaverð og loftlagsbreytingar, sem geti gert að engu þær framfarir sem áunnist hafa.
Í samkomulaginu frá Accra felast eftirfarandi lykilatriði:
· Horfur næstu ára - veitendur þróunaraðstoðar upplýsi um horfur næstu þrjú til fimm árin um stuðning við viðtökuríki.
· Innanlandskerfi - kerfi viðtökuríkja verði notuð við að koma framlögum til skila sem fyrsti kostur, fremur en eigin kerfi framlagslandsins.
· Skilyrðingar - veitendur þróunaraðstoðar falli frá fyrirskipandi aðstæðum um það hvenær og hvernig þróunarfé sé varið og taki upp þróunarmarkmið viðtökuríkis.
· Óbundin - veitendur þróunaraðstoðar slaki á hömlum sem koma í veg fyrir að þróunarríki kaupi vörur og þjónustu, af hverjum og hvenær sem er, þar sem gæðin eru mest og verðið lægst.
|
| Of margar stofnanir, of mörg verkefni, of margar aðferðir.. |
 Meginvandinn er ekki sá sem fátæk ríki og frjáls félagasamtök kvarta mest undan: of lítið þróunarfé. Staðreyndin er sú að opinber framlög til þróunarmála hafa aukist lítillega frá því um miðjan síðasta áratug, bæði hvað varðar raungildi og sem hlutfall af þjóðartekjum þeirra sem veita þróunaraðstoð. Vandinn er fremur sá að þróunaraðstoðin er brotakennd: of margar stofnanir sem fjármagna of mörg smáverkefni og nota of margar mismunandi aðferðir.
Þannig segir í fróðlegri fréttaskýringu The Economist um vanda alþjóðlegrar þróunarsamvinnu. Þar kemur t.d. fram að í Eritreu, því litla landi, séu starfandi 21 opinber stofnun, í Úganda séu þær 27. Í 38 fátækum ríkjum hafi árið 2006 verið starfandi 25 eða fleiri opinberar stofnanir í þróunarsamvinnu. Á tíu árum hafi verkefnum á vegum slíkra stofnana fjölgað úr tíu þúsund í áttatíu þúsund!
Þá séu ótalin frjáls félagasamtök. Gífurleg fjölgun þeirra skýri stóran hluta af vandanum. Árið 2000 voru slík alþjóðleg frjáls félagasamtök 37 þúsund. Árið 2005 var framlag þeirra til þróunarmála 27 milljarðar dala borið saman við 84 milljónir frá opinberri aðstoð. Lesið greinina |
| Alþjóðleg sjálfsmynd Noregs til skoðunar |
 Utanríkisstefna Noregs er í endurskoðun. "Noregur verður að setja þau svið í forgang þar sem við getum skipt sköpum, segir Jonas Gahr Støre utanríkisráðherra Noregs í viðtali við Bistandsaktuelt. Hann nefnir þrjú svið í þessu sambandi þar sem Norðmenn hafa byggt upp sérþekkingu og reynslu, verndun regnskóga, bólusetningar og að draga úr losun koltvísýrings út í andrúmsloftið.
Utanríkisstefna Noregs verður lögð fyrir og rædd á Stórþinginu á komandi vori. Tíu ár tæp eru frá því utanríkisstefnan var mörkuð síðast. Í greininni í Bistandsaktuelt er fjallað um átta klemmur (dilemma) sem Norðmenn standa frammi fyrir í utanríkismálum. Nánar í Bistandsaktuelt |
|
|
|
|
| Langt í land með að ná markmiðum Parísaryfirlýsingarinnar |
 |
Á fundinum í Accra var lögð fram ný könnun EURODAD á framvindu þróunarsamvinnu í ljósi Parísaryfirlýsingarinnar sem náði til 31 veitenda þróunaraðstoðar og 54 viðtökuríkja. Niðurstöðurnar sýna að því fer fjarri að veitendur þróunaraðstoðar séu á réttri leið með að ná yfirlýstum markmiðum Parísaryfirlýsingarinnar fyrir árið 2010.
Bent er t.d. á að framlög til þróunarmála séu ófyrirsjáanleg, þannig hafi Sambía t.d. fengið næstum því þriðjungi minna framlag en veitendur þróunaraðstoðar höfðu heitið. Þá kemur í ljós að innan við helmingur þróunarfjár, 46%, sem ríku þjóðirnar segjast verja til þróunarmála fari til fátækra ríkja. Ennfremur kemur fram að sumar þjóðir verja miklu minna fé til málaflokksins en haldið er fram, í þeim hópi séu Lúxemburg, Belgía, Bretland og einnig Evrópusambandið, meðan aðrar þjóðir veiti meira fé til fátækra ríkja en þær segjast gera, t.d. Spánn og Portúgal. Bæði undir- og yfirskot af þessu tagi geri fátæku ríkjunum erfitt fyrir um að hagnýta fjármagnið.
Úrdráttur úr skýrslunni neðst á þessari síðu í Word Skýrslan í heild (pdf) |
| Dagbækur Stefáns Jóns frá Afríku |
|
Nýjasta greinin frá Stefáni Jóni Hafstein umdæmisstjóra
ÞSSÍ í Malaví á heimasíðu hans fjallar um pólítískt umrót í Afríku.
Hann skrifar m.a.:
Afríka hefur nefnilega ekki enn bitið úr nálinni með nýlendutímann. Angóla er núna loksins að feta sig úr fjötrum fortíðar, og þó varla. Í Simbabwe situr Mugabe enn þrátt fyrir að hafa tapað kosningum í vor og ræðuhöldin snúast um Breta, Harold Wilson sem var forsætisráðherra 1960 og eitthvað - og kúgun hvíta mannsins. Gamla frelsishetjan ætlar ekki að gleyma vopnaðri baráttu, fangelsisvist og áþján og skuldar engum neitt. Bæði í Zimbabwe og Keníu virðast stjórnvöld ætla að komast upp með að sitja hvað sem líður úrslitum kosninga og mynda ,,þjóðstjórn" með hinum raunverulegu sigurvegurum sem hafa bara um tvennt það velja: Málamiðlun með afarkostum eða blóðbað.
|
| Börn í Úganda syngja lag Bjarkar |
 Á My Space síðu Bitone barnaheimilisins í þorpinu Lugoba í Úganda er hægt að hlusta á börnin syngja lag Bjarkar Guðmundsdóttur "All is full of love" í undurfögrum búningi eins og Morgunblaðið lýsti því í gær. Orð að sönnu. Heimilið er rekið fyrir börn sem hafa lent í miklum áföllum, misst foreldra eða heimili. Lítið við á síðu barnanna á My Space Heimasíða barnaheimilsins |
| Farsímar í baráttuna við alnæmi |
Útbreiðsla HIV veirunnar færist í vöxt í Úganda og yfirvöld leita nýrra hugvitsamlegra leiða til að fræða almenning um veiruna. Nýjasta tækið í baráttunni við alnæmið er farsíminn en sú tækni nær sífellt til fleiri íbúa landsins og unnt að koma smáskilaboðum með SMS til milljóna manna. Talið er sex milljónir Úgandabúar verði kominir með farsíma í árslok. Frétt PlusNews | |
|
